Paplajahan 3: Indik Anake sane Marabian
(Epesus 5:22-33)
3
22 Anak istri sapatutne ngendepang raga kapining somahnyane, sekadi ngendepang raga kapining Sang Ratu Agung. 23 Santukan anak lanang dados pemimpin somahnyane pinaka sirah ring ragannyane. Sekadi punika Sang Hyang Kristus sampun dados pemimpin para krama druen Idane, tur Ida sane dados Juru Rahayu ring para krama druen Idane sane pinaka anggan Idane. 24 Sapatutne para krama druen Sang Hyang Kristus ngendepang raga kapining Ida. Kenten pada anak istri musti ngendepang raga kapining somahnyane ring sekancan paindikan.25 Anak lanang musti tresna asih kapining somahnyane, sekadi Sang Hyang Kristus welas asih kapining para krama druen Idane. Ida nyerahang anggan Idane 26 buat nyuciang krama druen Idane. Ida sampun nyuciang ipun sami nganggen pengajahan Idane. Paindikane punika kaumpamiang sekadi Ida mersihin ipun sami nganggen toya. 27 Sang Hyang Kristus malaksana sekadi punika mangdane para krama druene prasida tangkil ring ajeng Idane, antuk kaagungan lan kasucian tur tanpa cacat neng akidik. 28 Sekadi asapunika anak lanang sapatutne tresna asih kapining somahnyane sekadi ipun tresna asih kapining deweknyane padidi. Anake sane tresna asih kapining somah, artine ipun tresna asih kapining deweknyane padidi. 29 Nenten ja wenten anak sane gedeg kapining deweknyane padidi. Nanging ipun miara lan nyaga deweknyane sekadi Sang Hyang Kristus miara krama druen Idane. 30 Iraga kapiara olih Ida krana iraga pinaka anggan Idane. 31 Ring Cakepan Sucine katulis sapuniki, “Punika mawinan anak lanang jagi nilar reramannyane tur jangkep sareng somahnyane, mangdane makakalih dados siki.” \ 32 Pengajahane puniki madue arti sane dalem pisan, inggih punika indik ubungan Sang Hyang Kristus sareng para krama druen Idane. 33 Nanging paindikane punika taler buat ragane: sapatutne anake lanang tresna asih kapining somahnyane sekadi ipun tresna asih kapining deweknyane padidi. Tur anake istri musti subakti kapining somahnyane.
Penuntun mabligbagan ring pasamuan
1. Ngaturang penyuksma.
“Ngiring ja iraga ngaturang suksma mangkin. Semeton jagi ngaturang suksma indik napi?"
2. Ceritayang ja pakeweh semetone suang-suang raris iraga saling tunas icayang.
“Napike semeton wenten pakeweh mangkin?”
3. Ngwacen utawi mirengin paplajahane puniki.
4. Saurin ja pitakenne puniki:
i. “Napi sane plajahin iraga indik Sang Hyang Tunggal saking ceritane puniki?”
ii. “Napi sane plajahin iraga indik manusa saking ceritane puniki?”
iii. “Napi sane plajahin iraga indik pajangkepan anak lanang sareng anak istri iriki?”
iv. “Napi sane kaprentahang kapining anak lanang? Napi sane kaprentahang kapining anak istri?”
v. “Ubungan Sang Hyang Kristus sareng para krama druen Idane punika, napi ubungane sareng pengajahan indik anak sane marabian?”
vi. “Sekadi napike sapatutne iraga nyalanang idup manut pengajahane puniki?"
vii. “Kapining sirake sapatutne iraga nyeritayang malih paplajahane puniki?”